十月生活感覺

麽人恁早萋

半夜三點電線企
單鳥一隻恁孤栖

在地客家菜
當季當時好入嘴
特色風味有搭碓

燒暖日頭出
鹹淡拿出禾埕晒
歸身香氣鼻公入

望得秋收過
平安戲做廟坪前
老嫩大細共一堂

夢幻也泡影
人生路項莫著驚
一步一腳真有影

對面靚細妹
開容笑面逐等來
歡喜迎接一場夢

壁蛇毋係蛇
屋下壁項爬啊爬
看着蚊仔加減抓

除忒噭一場
還有麼个表哀傷
面對親朋个離開

客語文學路
記得起步个當初
行在理想个路途

暗夜秋風涼
被骨蓋等睡眠床
一覺睡到天大光

秋日西片落
長衫長褲記得著
涼風吹久會寒着