雜貨營生甘苦談

移民來美國
二十幾年一眨目   
初初到來甘苦多
 

芝加哥入關
頭年打雜密西根
後悔出國心茫茫
      

同學盡幫忙
來到紐約做生利
萬事起頭冇容易
      

從來冇做過
雜貨生利盡複雜
種類繁多目看花 
  

Buckley 超市
店在綠點波蘭區
人客善良又老實


顧客少華人             
販賣食品為洋人      
冷切放滿歸冰箱


煞猛做生利              
冇年冇節冇時閒       
賺錢冇多全家忙
      

細人愛幫忙              
又愛讀書又愛做      
好得畢業研究所


雜貨介生利                
強搶偷拿得人驚        
防不勝防目剝金
       

算盤愛精打                          
薄利多銷大色貨
囤積打折利純多
        

煙酒看人賣
一時疏忽冇葛煞       
法院罰錢冇奈何 
      

經營雜貨店
家庭開銷省盡多      
日日冇閒用錢少
     

也做三明治
人客注文聽清楚      
淨利好食人上門
     

官員來檢查
店內除人冇動物        
架頂罐頭灰塵除


便利介商店
人客固定像朋友
相互關懷真難得
    

人客像朋友 
閒話家常笑哈哈 
好事歪事總參加
 

做介細生利
進貨銷售親落身    
日日超過十點鐘


生利愛賺錢
童叟唔欺講誠信             
常客固定最放心 
   

冷切生利好
火腿起司薩拉米
洋人聚餐三明治


飲料特別多
啤酒汽水歸百種
冰箱補貨盡費神
           

到今十過年
想起尤金心淒涼
獨留老姆跳樓亡
                              

孤獨一老人
日日定時來交官            
幾日冇見去探看 
           

瑪莉盡友善
單親撫養三子女             
服侍老哀盡孝心
           

約翰捱幫手
十年生利幫忙大
忠心耿耿值得賞