十月生活感覺

麽人恁早萋

半夜三點電線企
單鳥一隻恁孤栖

在地客家菜
當季當時好入嘴
特色風味有搭碓

燒暖日頭出
鹹淡拿出禾埕晒
歸身香氣鼻公入

望得秋收過
平安戲做廟坪前
老嫩大細共一堂

夢幻也泡影
人生路項莫著驚
一步一腳真有影

對面靚細妹
開容笑面逐等來
歡喜迎接一場夢

壁蛇毋係蛇
屋下壁項爬啊爬
看着蚊仔加減抓

除忒噭一場
還有麼个表哀傷
面對親朋个離開

客語文學路
記得起步个當初
行在理想个路途

暗夜秋風涼
被骨蓋等睡眠床
一覺睡到天大光

秋日西片落
長衫長褲記得著
涼風吹久會寒着

秋雨

日安 平安詩

秋雨落等來
菜園菜箱改等來
大菜蘿蔔種等來

樹頂柿仔紅
毛籣愛吹九降風
主人人客喜相逢

我夢啊夢仔
仰會看著恁像你
行在該條山路項

挷幾條蘿蔔
帶轉屋下炆爌肉
阿姆歡喜自家有

人生夢一場
仰般在夢中修行
應無所住生其心

目珠擘啊開
又係一日好時光
屋脣鳥仔啾啾滾

工程聲隆隆
莊下老人無異慣
哪時完工變恬靜

孤栖來做伴
一杯酒來一杯茶
毋使明月來過家

環境多變化
電線頂个白翼仔
比屋簷鳥還較多

河壩沙蔗花
風吹雨涿漸落泥
秋天定定仔過冬

秋雨落心頭

菜園野草多過菜
一片青青也好看

秋

秋晨發春夢

遠方个人目珠濛
熟事聲情傳耳公

明月掛山巔
哪知孤栖來做伴
想念朋友在天邊

風颱小犬

小犬吠等來

聽著風聲掃掃滾
鳥仔樹花唉唉滾

小犬係狗子
抑係人講細狗仔
變到風颱得人惱