秋雨

日安 平安詩

秋雨落等來
菜園菜箱改等來
大菜蘿蔔種等來

樹頂柿仔紅
毛籣愛吹九降風
主人人客喜相逢

我夢啊夢仔
仰會看著恁像你
行在該條山路項

挷幾條蘿蔔
帶轉屋下炆爌肉
阿姆歡喜自家有

人生夢一場
仰般在夢中修行
應無所住生其心

目珠擘啊開
又係一日好時光
屋脣鳥仔啾啾滾

工程聲隆隆
莊下老人無異慣
哪時完工變恬靜

孤栖來做伴
一杯酒來一杯茶
毋使明月來過家

環境多變化
電線頂个白翼仔
比屋簷鳥還較多

河壩沙蔗花
風吹雨涿漸落泥
秋天定定仔過冬

秋雨落心頭

菜園野草多過菜
一片青青也好看